КШ · Тантралока · Поиск по сайту
← Глава 35 — Śāstramelanam · Глава 37 — Śāstropādeyatvanirūpaṇam →
Atha śrītantrāloke ṣaṭtriṁśamāhnikam|
36.1 Āyātiratha śāstrasya kathyate'vasarāgatā|
Śrīsiddhādivinirdiṣṭā gurubhiśca nirūpitā|
Bhairavo bhairavī devī svacchando lākulo'ṇurāṭ||36.1||
36.2 Gahaneśo'bjajaḥ śakro guruḥ koṭyapakarṣataḥ|
Navabhiḥ kramaśo'dhītaṁ navakoṭipravistaram||36.2||
36.3 Etaistato guruḥ koṭimātrātpādaṁ vitīrṇavān|
Dakṣādibhya ubhau pādau saṁvartādibhya eva ca||36.3||
36.4 Pādaṁ ca vāmanādibhyaḥ pādārdhaṁ bhārgavāya ca|
Pādapādaṁ tu balaye pādapādastu yo'paraḥ||36.4||
36.5 Siṁhāyārdhaṁ tataḥ śiṣṭāddvau bhāgau vinatābhuve|
Pādaṁ vāsukināgāya khaṇḍāḥ saptadaśa tvamī||36.5||
36.6 Svargādardhaṁ rāvaṇo'tha jahre rāmo'rdhamapyataḥ|
Vibhīṣaṇamukhādāpa guruśiṣyavidhikramāt||36.6||
36.7 Khaṇḍairekānnaviṁśatyā vibhaktaṁ tadabhūttataḥ|
Khaṇḍaṁ khaṇḍaṁ cāṣṭakhaṇḍaṁ proktapādādibhedataḥ||36.7||
36.8 Pādo mūloddhārāvuttarabṛhaduttare tathā kalpaḥ|
Sāṁhitakalpaskandāvanuttaraṁ vyāpakaṁ tridhā tisraḥ||36.8||
36.9 Devyo'tra nirūpyante kramaśo vistāriṇaiva rūpeṇa|
Navame pade tu gaṇanā na kāciduktā vyavacchidāhīne||36.9||
36.10 Rāmācca lakṣmaṇastasmātsiddhāstebhyo'pi dānavāḥ|
Guhyakāśca tatastebhyo yogino nṛvarāstataḥ||36.10||
36.11 Teṣāṁ krameṇa yatprāptaṁ bhraṣṭaṁ kālāntarādyadā|
Tadā śrīkaṇṭhanāthājñāvaśātsiddhā avātaran||36.11||
36.12 Tryambakāmardakābhikhyaśrīnāthā advaye dvaye|
Dvayādvaye ca nipuṇāḥ krameṇa śivaśāsane||36.12||
36.13 Ādyasya cānvayo jajñe dvitīyo duhitṛkramāt|
Sa cārdhatryambakābhikhyaḥ santānaḥ supratiṣṭhitaḥ||36.13||
36.14 Ataścārdhacatasro'tra maṭhikāḥ santatikramāt|
Śiṣyapraśiṣyairvistīrṇāḥ śataśākhaṁ vyavasthitaiḥ||36.14||
36.15 Adhyuṣṭasantatisrotaḥsārabhūtarasāhṛtim|
Vidhāya tantrāloko'yaṁ syandate sakalānrasān||36.15||
← Глава 35 — Śāstramelanam · Глава 37 — Śāstropādeyatvanirūpaṇam →