КШ · Тантралока · Поиск по сайту
← Глава 19 — Sadyaḥsamutkrama · Глава 21 — Pārokṣī →
Atha śrītantrāloke viṁśatitamamāhnikam|
20.1 Atha dīkṣāṁ bruve mūḍhajanāśvāsapradāyinīm||20.1||
20.2 Trikoṇe vahnisadane vahnivarṇojjvale'bhitaḥ|
Vāyavyapuranirdhūte kare savye sujājvale||20.2||
20.3 Bījaṁ kiñcidgṛhītvaitattathaiva hṛdayāntare|
Kare ca dahyamānaṁ saccintayettajjapaikayuk||20.3||
20.4 Vahnidīpitaphaṭkāradhoraṇīdāhapīḍitam|
Bījaṁ nirbījatāmeti svasūtikaraṇākṣamam||20.4||
20.5 Taptaṁ naitatprarohāya tenaiva pratyayena tu|
Malamāyākhyakarmāṇi mantradhyānakriyābalāt||20.5||
20.6 Dagdhāni na svakāryāya nirbījapratyayaṁ tvimam|
Sa śrīmānsuprasanno me śambhunātho nyarūpayat||20.6||
20.7 Bījasyāpyatra kāryā ca yojanā kṛpayā guroḥ|
Yato dīkṣā sudīptatvātsthāvarāṇyapi mocayet||20.7||
20.8 Yo gururjapahomārcādhyānasiddhatvamātmani|
Jñātvā dīkṣāṁ carettasya dīkṣā sapratyayā smṛtā||20.8||
20.9 Avadhūte nirācāre tattvajñe natvayaṁ vidhiḥ|
Sācāraiḥ kriyate dīkṣā yā dṛṣṭapratyayānvitā||20.9||
20.10 Nirācāreṇa dīkṣāyāṁ pratyayastu na gadyate|
Jñānaṁ svapratyayaṁ yasmānna phalāntaramarhati||20.10||
20.11 Dhyānādi tatphalātsādhyamiti siddhāmatoditam|
Tulāśuddhiparīkṣāṁ vā kuryātpratyayayoginīm||20.11||
20.12 Yathā śrītantrasadbhāve kathitā parameśinā|
Śrīpūrvaśāstre'pyeṣā ca sūcitā parameśinā||20.12||
20.13 Ānanda udbhavaḥ kampo nidrā ghūrṇiśca pañcamī|
Ityevaṁ vadatā śaktitāratamyābhidhāyinā||20.13||
20.14 Udbhavo laghubhāvena dehagrahatirohiteḥ|
Deho hi pārthivo mukhyastadā mukhyatvamujjhati||20.14||
20.15 Bhāvilāghavamantreṇa śiṣyaṁ dhyātvā samutplutam|
Karmāṇi tatrāśeṣāṇi pūrvoktānyācaredguruḥ||20.15||